Сөйтсек, бұлай жасау дұрыс емес екен. Мақсатыңды біреумен бөліспеген дұрыс. Неге дейсіз ғой? Ғалымдардың айтуынша, адам мақсатымен бөліссе, оның орындалу ықтималдығы азаяды. Мақсатын бөліскен уақытта күшті эмоция сезінеді. Ал бұл эмоция мақсатқа жеткен кезде шығатын эмоция екен. Солай, мақсатқа жетуге жұмсалатын энергияны әу бастан жұмсап қоямыз. Қуатымыз сарқылып қалады.
Ғалымдар бұлай деуден бұрын бірнеше тәжірибе жасаған. Бәрінің нәтижесі бірдей болған. Ол былай: екі топқа мақсаттарын жаздырады. Сосын бір топқа осы мақсаттарыңды танитын адамдармен бөлісіңдер дейді. Екінші топқа ешқандай нұсқау берілмейді. Содан екі топқа да мақсаттарына жету үшін сағат бойы еңбектенуді тапсырады. Бірінші топ, яғни мақсатын бөліскен топтың адамдары жарты сағаттан соң болбырап, шаршай бастайды. Күштері бір сағатқа жетпейді. Ал екінші топ, яғни мақсатын бөліспеген адамдар бір сағат бойы концентрациясын үзбей еңбектенеді.
Мақсатыңа қол жеткізген кезде бөліскен дұрыс шығар. Ал мақсатты айқындай сала бөліспеу керек екен. Есіңізде болсын.